|
Sintiti,
sintiti, sintiti.
Viniti tutti a sentiri 'ntornu a mia.
Sintiti, sintiti, sintiti.
Scinniti omini e fimmini p'i la via.
Sintiti, sintiti, sintiti.
U cuntastorii 'ncumencia a bbanniari.
Sintiti, sintiti, sintiti.
Chista iè na storia vera 'nfacci o mari.
Nt'à villi e valli e nt'à voscura funni,
Unni è Nina; Danti ddhà si spria.
La va p'i circari e nun sapi unni.
P'i lu so amuri lu munnu firria.
M'addisiassi nu tritrattu d'iddha,
Chi prova i robbi fini 'nt'à la via.
Permanenti frisca, comu 'na stidda,
La bedda Ilenia tutta 'llucia.
Nt'ò mari a filuca 'rranca armata,
Cerca di lanzari a fimminedda.
Di pisci ziti iè storia cunzumata,
Chi strinci u cori e 'ntruscia li budedda.
Turnava spinsirata, pedi scosa,
Turnava 'n muturi capiddi o ventu.
Finuta a scola, nt'à stati si riposa,
A chi ti spetta ivì . un coppu a centu.
Sognu, miraggiu o mera 'llusioni,
Comu Fata Murgana 'ntr'à lu strittu,
L'iridi mamertina chi s'imponi,
Si metti n menzu e non si vidi chiù rittu.
I cussa o Policlinicu iè purtata,
'N neurochirurgia a Missina,
Trombosi carotidea iè accirtata,
A fisioterapista ci va a sesta matina.
Ddh'Angelica vantata 'nt'à la storia
D'Orlandu e Rinaldu, paladini,
Firrianu li so' spadi, nt'à 'll'aria,
Cummattunu contra i mali saracini.
A figghiola era scantata assai,
Sintia li so' carni spusissati.
" Curaggiu, a matri, non lassari mai.
Tanti passaru i cchà e cchiù scuncassati."
Chi splinduri iè u tiatru marittimu,
Chi vista ricca e spittaculari.
Bosfuru Zancleo u 'ntìnnimu,
Tutti sann'a sempri miravigghiari.
O Centru Neurolesi continua a trama,
Cu Santina e Patrizia p'a terapia.
Brazzu, parola, jamma e capiddi brama,
Ma ddha bbanna da finestra n'a vidia
Dina e Clarenza, vigili nt'à nuttata,
Sabbaru Missina d'i francisi.
Carlu D'Angiò trova a strata sbarrata,
Petri d'n coddu e campani 'ntisi.
A prioccupa assai a malatia,
Si senti cunfunnuta e maniata.
So' matri ci cunsigghia la via,
Du libri si liggiu nt'à na nuttata.
Fimmini missinisi, chi gran curaggiu,
Cummattunu i Vespri Siciliani
Ristanno beddi comu i rosi i maggiu,
Su' cori, testa e forza ntr'à li mani.
Cu Filippu annau a travagghiari,
Nt'à palestra o spitali Piamonti.
Cu gonnelli ranni si visti arrivari,
Esercizi fa tabilluni 'n fronti.
Rosa Donatu, cannuneri n pettu,
Cummattiu p'i strata u quarantottu,
Difinnennu a tutti i banni sempri rettu,
Lanzetta mentri priparava u bottu.
A figghiola i so' amicizii pirdiu,
Sta sempri intra tutta a jurnata.
"Chatta" nt'à internet cu gran disiu
E nt'ò cellulari si spetta na chiamata.
Missina ti vosi n terra la svintura,
Autri voti sparti di ddha matina.
Tu eri e resti na vera signura,
Circau . ma non ti mittiu 'ncatina
Lu vintidui di marzu du dumila,
U to' vuleri ebbi soddisfazioni,
Ncapu a ddhi trampuli fai rizzari i pila,
Nt'à caminata uora nni fai lizioni.
A Vara, Virgini Assunta maistusa,
Tirata è p'i li strati i pisu.
A Matri a Littra, patruna ggenerusa,
Attornu ci giria tuttu u Paradisu.
Ilenia è dda femma avant'a tutti.
So patri s'avvicina a nu divotu,
E c'un filazzu, di ddi coddi rutti,
Nu bracciali ci fa e porta u votu.
A vita oramai mpuni u diploma,
Dicunu c'a scola nni fa a tutti pari,
E prufissuri s'ava dari caloma,
Crediti ti dannu ma ha scriviri e parrari.
Davanti a cummissiuni riunita
Ti cumporti bona, . . . studiasti.
Unu di tanti esami d'a to' vita,
A promozioni propiu ti meritasti.
Nt'à sta storia chi cantari vi vosi.
Viditi comu ognunu nt'à so' vita,
Nuddu po' diri no! No a sti cosi.
Na malatia non vadda si si zita,
Si si maritata o schetta, c'u o senza figghi,
Spascia una o chhiù funzioni,
Ti lassa ferma p'i unni pigghi pigghi.
Jai abbisognu di bona riabilitazioni!
Sintiti comu sona sta rumanza:
llenia rricanùsci i so ddifficultà;
Si preja pi chiddu chi s'avanza;
E cura sempri chiù la so biltà.
Divintau n'anticu omu di panza,
Parra sincera e parti senza viltà!
|
|
