E lu francisi cu la so putenza
‘nSicilia facia malacrianza
lu pani ni livava di la mensa
francisi si vidianu ad ogni stanza
iddi fidannu nni la so putenza
e nui mischini sutta la so lanza
‘nta n’ura fu distrutta dda simenza
fu pi tunnina salata la franza

‘Na vuci pi li strati chi gridava
nun lu sintiti lu vespru ca sona
ed ognunu l’armi si pigghiava
contro lu francisi nesci fora
Tuttu lu populu vinnitta gridava
Puru li donni vonnu fari prova
Lu sangu tradituri ognunu abbrama
Picchì lu sangu l’onuri arrinnova

Senti la Francia ca sona martoria
La francia nun veni cchiù ‘nSicilia
Viva Sicilia ca porti vittoria
Viva Palermu fici mirabilia
Sunati tutti li campani a gloria
Spinciti tutti l’armi tirribilia
Ca pi l’eternu ristò a mimoria
Ca li francisi ristaru ‘nSicilia