Vitti 'na crozza supra nu cannuni,
fui curiusu e ci vosi spiari (e cù sta crozza mi misi a parlari).
Idda m’arrispunniu cu gran duluri:
“Muriri senza toccu di campani” (“Morsi senza 'nu tuccu di campani”).
S'innieru, s'innieru li me anni
s'innieru, s'inn eru nun sacciu unni.
Ora ca su arrivatu a uttant’anni (Ura ca sugnu vecchiu di tant'anni)
chiamu la vita e morti m’arrispunni (u vivu chiama u mortu e nun rispunni).
Cunzatimi, cunzatimi lu lettu
ca di li vermi su manciatu tuttu
si nun lu scuttu cca lu me piccatu
lu scuttu all’autra vita a chiantu ruttu.
Cunsatimi cu ciuri lu me lettu,
picchì alla fini già sugnu arriduttu;
vinni lu tempu di lu me rizzettu:
lassu stu beddu munnu e lassu tuttu.
Suli ca spacchi i petri d'a chianura
suli ca bruci l’ossa p’a calura
sulu lu chiantu di la donna amata
po’ rinfriscari st’alma scunsulata.
C’è nu jardinu 'n mezzu di lu mari,
tutto ‘ntissutu di aranci e sciuri,
unni l’aceddi ci vannu a cantari
e tutti i pisci ci fannu all’amuri.
Senti li trona di lu Mungibeddu
chi ghietta focu e fiammi a tutti i lati,
o Bedda Matri, Matri addulurata,
sarva la vita mia e da mia amata.
Chi n'haiu a fari cchiu di la mi vita
nun sugnu bonu cchiu pi travagghiari
sta vita è tutta fatta di duluri
e d'accussì nun vogghiu chiu campari.