|
Naskidu in su 1319, mortu in su 1376.
A sa morte de su frade Pedru III, in su 1347, a s'edade de 28 annos, Marjane est'istadu postu in sa cadrea judicale (de seguru in "Corona de Logu").
In su 1331 est a Barcellona e armadu cavaleri.
In su 1336 in Barcellona koiuada donna Timbora de sos Roccabertì.
In 1337 nasked Ugone (III).
S'11 de Cabudanne de su 1339 est fattu Conte de su Gocianu e Sennore de sa Marmidha Kalaritana. Fortzis in su 1340 nasked Elionora et in su 1342 iat a depper nasker Beatrice.
In su 1342 torrad'in Sardigna kin totta sa familia: abitat prus 'e tottu in su kastedhu 'e Gociano, favoressende kantos andaian ad abitare su burgu (oe Burgos).
In su 1343 si faghet fare ritratu in pees de sa Madonna, kin s'ispada de cavalleri in kintu. Custu s'agattat in su politticu de sa catedrale de Othana, tando cadrea de su piscamu de su feodu sou de Gociano. In sa pintura b'est iscrittu: "frater Silvester episcopus octanensis + dominus Marianus de Arborea dominus Gociani et Marmille fecit fieri".
In su 1353, a sas primas dies de Cabudanne, priminziat sa gherra kuntra s'Aragona.
Su Rennu de Arborea tenia pro bandera s'arbure deirraghinadu in campu albu [castia su pintu nu 4]; kin Ugone II e Pedru III s'arbure e sos palos de Aragona pare ki fessin allobados [castia su pintu nu 2]. A s'incommintzu, dae su 1339, pare fintzas ki sos palos fessin postos subra s'alvure deirreghinadu [castia su pintu nu 1]. In su cabudanne de su 1352 sos palos sun postos in sa parte dae sutta [castia su pintu nu 3]. Su 12 de Santu Bainzu 1353 su quartesu Comita de Mahines testimonzat ka in Aristanis sa bandera de s'Arborea teniat totu su campu albu e intro solu s'arbure irde. Semus torrados dae priminziu e at a pompiare finas a su 1420, annu de sa batalla de Sedhori.
Sa die 15 de Santu Bainzu 1353 Marjane, kin Matteu Doria, pigat S'Alighera (ocupada su 30 de Austu dae Bernardo de Cabrera) ma si la torran su 16 de Onnia Santus pro akordiu diplomaticu ki si kongruid kin sa paghe de Sedhori de 11 de Triulas de su 1355.
Su 18 de Santu Bainzu 1365 Marjane torrat a gherra, gherra deliberada dae sa "Corona de Logu". A sa fin'e s'annu sa Sardigna totta, mancande solu su castedhu de Karale, S'Alighera e Tathari, fi kin Marjane.
In su Mes'e Lampadas de su 1368 Pedro Martinez de Luna, mandadu da Pedro III d'Aragona, kin d'unu esercitu mannu meda, intrad'in s'Arborea e ponet Aristanis in assediu. S'Aragonesu fue bintu e bi moriat in Piana 'e Sant'Anna (kin su donnikellu Ugone). Marjane, in Triulas de su 1365, tenet Tathari puru.
A su bisu de Unidade Natzionale no b'arribat ca morit de peste, in s'Istiu de su 1376, a s'edade de 57 annos.
|
|
