MAURIZIO MATTIUZZA
Al somee che Maurizio si stupis a scuviargisi poete, al ven catapultât tal viers stess, si fâs viers rût scuasit a sfruçonâ la sô anime dentri imagjinis cognosudis. Di lontan i ecos di un mont sfavillant, sort, che al glot cualsisei che j vivi, culì il mont al’ è simpri chel, “lis solitis robis” al dîs “chês di ogni dì”, culì un mont lent, immobil, sort ancje lui a lis clamadis de anime.
Nol esist un luc ideâl fin che nol cjate tal ricuart, un amôr lassât lâ, un ami piardût, un respîr di pâs, un futûr afiet desiderât, une femine di sveâ teneramentri. Ienfri la nature amie al cjape flât, al cjate protezion, sigurece tant di volê deventâ part di je e cjalâ cheiatris, tirantsi un pôc in bande, distacantsi di ce che a lu fâs stâ mal; bramôs di cressi e di capî. Ienfri la nature nemie o feride riflét i siumps sdrumâts, il desideri di svolâ ad alt, di vê tocjât il cîl e di jessi restât ferît.
