FABIAN RIZ

“Nuda e cruda” a è la realtât di Fabian, sence mediazions, sence metaforis. Nol ignore che la semplicitât ta l’espression e agiss plui profondamentri in chei ipocrits vêi imponûts de “buine educazion” formâl e stilistiche. La veretât e jè culi denant i voi cuant che l’ispirazion dionisiache lasse spazi a une lustre comunicazion e la comunicazion e jè un viers essenziâl sence inibizions e sence sgherlifs. L’amôr al è sempliç come che al è sempliç il viaç, ma in cualsisei bande che tu vadis tu restis cussì, cemut che tu sês, cuntun cuarp che al ven fûr te sô espression mancul poetiche cussì come che al è pôc poetic il mont atôr, cuntune ment che e smamiss tal pinsîr scheletric e la dibisugne di tenereçe e jè indispensabil pa no jessi glotût, involuciât tal vivi di ogni dì, banalizzât tal zuc de vite. Un amôr dulinciôs daspo dut chist contrast di imagjinis fumôsis e garbis, un niçulament, par no fâ smamî i pinsîrs plui cjars e dolçs cussì il viers a si diferenzin de dolceçe di une balade al slambrament dal viers a te cuscience che in ogni bande che tu vadis tu sês simpri di bessol.