“ Ij mè Vej “

O vej ‘d mia ca, cost sangh che an ancaden-a

a l’é ‘d na fòrsa che a tëm nen la mòrt:

basta che iv pensa për che im senta fòrt,

për che im senta la ment ciàira e seren-a;

basta che iv pensa për che im senta a bate,

an drinta e ancreus, robust e calm, vòst cheur,

ant j’ore bele e ant le stagion ‘d maleur,

sensa paure e sensa veuje mate.

. . . . .

E mi, novod lontan, sensa difèisa,

se im sento bzògn d’andé girand pais,

im sento ‘d cò gropà da sent radis

a vòstra veja tèra piemontèisa,

e ant j’ore grame che mi i l’hai paura,

quand che an sël cheur as pòsa n’ombra ‘d mòrt,

basta che iv pensa për che im senta fòrt,

për che im senta la ment ciàira e sicura.

Pinin Pacòt - (Giuseppe Pacotto)