Coi ch’a marcio an prima fila
pròpe ‘ntorn a la bandiera,
con na grassia matinera
ch’a ven sempre pì gentila,
che ‘nt l’armada ch’a defila
l’han j’anssëgne dij pì fòrt.
L’han na fiera facia spalia
j’euj distant, lusent e fiss . . .
Forse a vëddo an seugn l’Italia
ch’a-j saluta e a-j benediss,
forse a s-ciairo ‘l cheur ‘d soa
mama,
ch’a-j ricòrda pì tranquila,
forse a sento antorn la fiama
ch’a l’é staita ‘l sò confòrt.
Pòrto ncor sle vestimenta
la tempesta dle bataje,
la violensa dla tormenta
che ‘nt ël sangh l’ha batesaje . .
.
ma ‘ns’ël ross dle soe ferìe,
l’òr dël sol së specia e a brilà,
che Nossgnor l’ha benedìe
e la glòria a-j fa gnun tòrt . . .
L’é për lòn ch’a
son an tanti
che pì gnun peul
nen conteje,
l’é për lòn ch’a
van avanti
che pì gnun peul
nen fërmeje,
l’é për lòn che
‘nt l’ora grama
j’é na Fede ch’as profila
l’é për lòn che la soa Mama
l’ha spetaje pì tranquila
e a s’jé strens al cheur pì fòrt.
Coi ch’a marcio an prima fila
son ij Mòrt: ij nòstri Mòrt . .
(Nino Costa) |