Le fije ‘d mè pais son tute bele.

A rijo come j’onde tra doe rive.

L’han ij cavèj ch’a odoro ‘d ramulive.

Sò sangh a l’é un vin d’uve moscatele.

Le fije ‘d mè pais son tute bele.

Magara ij sò dilin san gnanca a scrive

ma, s’at carësso an front, at fan arvive.

E j’euj? Bleu dj’Alp, ël bleu dle gensianele.

Le fije ‘d mè pais son tute bele.

L’han nen studià la musica e ‘l latin:

ma ai camp a canto e an cesa a diso ‘l bin.

Mi l’hai mai vist al mond ëd fije pì bele.

Spose d’Alpin, d’alpin a saran mame.

Se ‘l  sol a splend, son lor ch’a-j dàn le fiame.

Le fije ‘d mè pais son tute bele.

(Luigi Olivero)