 |
Lady X de Gran Bretagna
La viaggiava col sò Scior,
la cercavo ona campagna
sott al sô e in mezz ai fior;
l'è staa inscì che l'han fittaa
la casetta d'on Curaa.
Molto critica e zabetta
l'haa guardaa de sott, de sora
quell'inglesa malerbetta,
el ciffon, la pandora,
l'ort, la stanza, la cantina,
el salott e la cusina,
ma per via del fora fora,
- l'era ormai visin bass'ora, -
se sa nò 'me l'è success,
s'hinn desmentegaa del cess.
Rivaa a cà col roseghin
de vess stada inscì pantola,
la ghe manda on bigliettin
per savè ona roba sola:
"Sior Prevost, beg you pardon,
urge preme informazion,
d'importanza capital:
pregaria de savè dì,
anca pur in general,
com'è fatto el vost W.C.
Grazie tante, God Vi bless,
please risponder per espress".
El Curaa, sto ciolandari,
l'ha creduu el fuss el Santuari
- pensa tì che gran trovada -
de la Vergin Consolada
e el ghe spiega volentera
pressapoch in sta manera:
"Quel tal sit de so interess
l'è a des mïa da la cà
e se la ghe va de spess
gh'è de corr e tapascià,
sariss mej andà in landò
per trovà de settass giò.
|
 |
|
Denter ghe sta un mucc de gent
omen, donn e piscinitt
tutti insemma ghe dann dent
a cantà come uselitt
per la gran soddisfazion
de provved a sta funzion.
Gh'è anca gent de poca fed
che s'incanta a guardà i mur
- propi roba de no cred -
quej che pensa che l'è dur
tant che disen el Rosari
sta sul legn col tafanari.
Gh'è chi sona la ghitara
chi... con l'orghen fa canzon;
chi sabetta, chi cicciara
chi se mett in genoggion
e chi spetta el premi eterno
dopo sto patì d'inferno.
Pront per tucc in su la porta
gh'è on fojett de carta fina
ma se a vun la ghe va storta
el po' digh a la vesina
per piasè de dagh el sò
che ghe la dà indree ancamò.
On microfon sberlusent
l'è pientaa sotta al plafon
sicchè quel che succed dent
l'è sentuu in tutti i canton
e fin anca in sul piazzal
per la gioia general.
L'è tutt quell che podi dì
Addì trenta, giovedì,
riverissi e basi i man
Devotissim Don Baggian".
|
