Misteri del  Rosario -Gaudiosi

 1

Diu ni manna l’ambasciata

Ca di l’angilu fu purtata

Di lu Figliu di Diu Patri

Già Maria fu fatta matri

RIT. O gran Vergini Maria

Mi cunsolu assai cu tia

 2

 Vi partistivu cu gran fretta

Pi la casa di Lisabetta

San Giuanni unn’era natu

E di Vui fu santificatu

RIT.O gran Vergini Maria

Mi cunsolu assai cu tia

 3

 Di na povera mangiatura

Parturì la gran signura

Mezzu lu vo’e l’asineddu

Nascì Gesu Bammineddu

Rit. O gran vergini Maria

Mi cunsolu assai cu tia

 4

 Comu l’atri fimmineddi

Peccatrici e puvireddi

A lu Tempiu vinni istivu

E Gesù l’offiristivu

RIT: O gran Vergini Maria

Mi consolu assai cu tia

 5

Quannu a Gesu lu pirdistivu

Lu circastivu e lu sintistivu

Ca spiegava la dottrina

Cu modestia divina Rit..(come sopra)

   Misteri dolorosi

 1

 Diu  all’ortu si disponi

Pi fari orazioni

E pinsannu a lu piccatu

Sangu veru Diu ha sudatu

Rit.O gran Vergini Maria

La to’ pena è curpa mia

 2

 A Gesuzzu lu pigliaru

Lu spugliaru,l’attaccaru

Li so’ carni flagellati

Cu seimila vastunati

Rit.O gran vergini Maria

La to’ pena è curpa mia

 3

 Re di burla ‘ncurunatu

Cu na canna sbriugnatu

Gran duluri ‘ntesta prova

Comu spini comu chiova

Rit.O gran Vergini Maria

La to’ pena è curpa mia

 4

 A la morti cunnannatu

Comu un latru scilaratu

La so’ cruci ‘ncoddu porta

Nuddu c’è chi lu conforta

Rit.O gran Vergini Maria

La to’ pena è curpa mia

 5

 A la vista di so’ matri

Crucifissu  mezzu du’ latri

Mori a forza di duluri

Lu me’ caru Redenturi

Rit.(come sopra)

Misteri gloriosi

 1

 Cristu già risuscità

Di la morti triunfà

E comu Re triunfanti

Scarcerà li patri santi

Rit.O gran vergini Maria

Mi rallegru assa’ cu Tia

 2

 Doppu quaranta jorna

Gesù Cristu ‘ncelu torna

E Maria cu’ li so’ amici

L’abbrazza e lu binidici

Rit. O gran Vergini  Maria

Mi rallegru assa’ cu Tia

 3

 Li jorna po’ passaru

e l’apostoli priaru

Maria santa li trattinni

E lu Spiritu Santu vinni

Rit. O gran vergini Maria

Mi rallegru assa’cu  Tia

 4

 Vinni l’ura di partiri

Maria’celu va a gudiri

E chi bedda sorti fu

Mezzu l’angili cu Gesù

Rit. O gran vergini Maria

Mi rallegru assa’ cu Tia

 5

 Maria ‘ncelu triunfà

Arma e corpu ‘ncelu sta

‘ncurunata fu regina

di la Trinità divina

Rit. O gran vergini Maria

mi rallegru assa’ cu Tia

Misteri della luce

 1

 San Giuanni a lu Giurdanu

Vattiava ogni cristianu

E Gesuzzu lu circava

Mentri Diu Patri lu chiamava

Rit. O gran Vergini  Maria

Fammi luci ntra la via

 2

 A Cana li sposini

Lu megliu vinu a la fini

Iddi dannu a l’immitati

Grazi’ a Maria e a la so’ bontati

Rit. O gran Vergini Maria

Fammi luci ntra la via

 3

A li genti di bona volontà

Gesù cuntava la verità

E ‘nsignava li confini

Di lu Regnu senza fini

Rit. O gran Vergini Maria

Fammi luci ntra la via

 4

Di l’apostoli li vuci

Ntra lu Tabor pi la luci

A Gesù dicianu forti :

“stamu ccà finu a la morti”

Rit. O gran Vergini Maria

Fammi luci ntra la via

 5

Tutti a tavula si truvaru

L’apostoli e si taliaru

Mentri  Gesù pani e vinu

Cangia ni lu so corpu divinu

Rit,O gran  Vergini  Maria

Fammi luci ntra la via

 Per ogni mistero si recitano 1 pater,10 ave,il gloria