|
|
Catena in Veronese
Dovi' molarghela da mandarme cadene del porco e simili, tipo che el mondo l'e' belo ma solo se rispedisso tuto subito, se no son sfiga', come el negro de l'alabama
che no la' risposto a quatromilasinquesento imeil e no la' fato in tempo a dir "a" che l'era sa col vestito de legno (tradotto: morto e stramorto), o el cauboi John, tessano, che
ghe casca' i maroni parcha' nol ga risposto etc etc.
Par no parlar de quei che me manda imeil disendome che sicome ghe un provaider (fatalita' american) che par ogni imeil che ghe riva el da' un centesimo in beneficensa ala lota contro la
peste scaveona, e alora bisogna mandarghene a seci..
O staltro che el ga na fiola con na malatia rarisima che nissuni sa cosa le' (sto qua el sta in missuri), che el te da' anca el numero de telefonin parche' te ghe telefoni ti (credeghe!) a
darghe notissie su le cure possibili (che po' se te guardi le date te scopriressi che e passa' almanco tri ani da che le' partia la cadena quindi tanti auguri...).
A mi te me ven a dimandar robe mediche, che stao in frassion de isola dela scala e son gnan bo de tacarme un ceroto?
Po' quei che me dise che ghe el virus dela posta eletronica che se non te ste atento telo ciapi anca ti e le' peso che anar co na nigeriana (e saven tuti a cosa se va incontro...), alora
te ghe da riempir tuti de imeil etc etc...
Quei po' che me manda la fotocopia del centro antitumori de Aviano dove i sensiati te dise che i ovi i fa vegner el cancro a l'usel e che farse un sciampo le' peso de fumarse tri steche de
"alfa sensa filtro".
Ancora quei contro i giaponesi, che secondo lori i metaria i gati nele butiglie, co l'urlo de bataglia "impenemoghe el sito!"....
Par non desmentegarme de ci me manda scrito che ghe quei dela Erisson che i da via i telefonini come i fusse bagigi e adiritura che lori i la' proa' e funsiona (!?!): basta "inviar el
mesagio a tuti quei che te conossi" e te si a posto: tempo do stimane e riva el sior Erisson, Mario Erisson in persona, aministratore delegato dela dita omonima, il cuale sa tute le
meil che te mandi, e te porta sul porton de casa el startosso col telefonin e custodia de pitone...
A sto punto feme un piaser: mandime foto porno, film porno, barzelete e putanade varie ma BASTA CO STE CADENE! che n'altro po e verzo na feramenta e taco a vendarle.
Con la speranza che sta meil no la riva in luisiana a una che le' drio farse i cassi sui...
Distinti saluti.
|
|
|
