Feneste che lucive e mo nun luce,

Sign'e' ca nenna mia stace malata?

S'affaccia la sorella e che me dice?

"Nennella toia e' morta e s' 'e atterrata."

"Chiagneva sempre ca durmeva sola;"

"mo dorme co li muorte accompagnata!"

- Cara sorella mia, che me dicite?

Cara sorella mia che me contate?

"Guarde 'ncielo si nun me credire.,"

"Purzi' li stelle stanno appassiunate."

"E' morta nenna vosta, ah, si chiagnite,

"Ca quanto v'aggio ditto e' beritate!

"Jate a la Chiesia e la vedite pure,

"Aprite lo tavuto e che trovate ?

"Da chella vocca che n'asceano sciure

"Mo n'esceno li vierme, oh che piatate!

"Zi' Parrocchiano mio, tienece cure,

"Le llampe sempre tienece allummate!".

Ah! nenna mia, si' morta, puvurella!

Chill'uocchie chiuse nun l'arape maje!

Ma ancora all'uocchie mieje tu para bella

Ca sempe t'aggio amata e mmo cchiu' assaje!

Potesse a lo mmacaro mori' priesto

E m'atterrasse a lato a tte, nennella!

Addio, fenesta; restate nzerrata,

Ca nenna mia mo nun se po' affacciare;

Io cchiu' nun passarraggio da sta strata;

Vaco a lo camposanto a passiare

Nzino a lo jurno che la morte 'ngrata

Mme face nenna mia ire a truvare.