Cu li cazune de rezze de funne
scarpe e cazette de pelle de tunno,
e sciammeria e sciammereino
d'aleche e pile de voje marino,
co buttone e buttunera
d'uocchie de purpe, secce e fera,
fibbia, spata e sciocche 'ndorate
de niro de secce e fele d'achiate.

Doje belle cateniglie,
de premmone de conchiglie,
'no cappiello aggallonato
de codarino d'aluzzo salato
tutto posema e steratiello,
jeva facenno lo sbafantiello,
e gerava de ccà e de llà:
la 'nnammorata pe' se trovà.

La Sardella a lo barcone
steva sonanno lo calascione;
e a suono de trommetta
jeva cantanno 'st'arietta:
"E llarè lo mare e lena
e la figlia d''a siè Lena,
ha lasciato lo 'nnammorato
pecché niente l'ha rialato".

Lo Guarracino 'nche la guardaje
de la sardella se 'nnammoraje;
se ne jette da 'na Vavosa
la cchiù vecchia maleziosa;
l'ebbe bona rialata
pe' mannarle la 'mmasciata;
la Vavosa pisse pisse
chiatto e tunno nce lo disse.

La sardella 'nch''a sentette
rossa rossa se facette,
pe' lo scuorno che se pigliaje
sotto a 'no scuoglio se 'mpezzaie;
ma la vecchia de vava Alosa
subete disse - Ah schefenzosa!
De 'sta manera non truove partito
'ncanna te resta lo marito.

Se aje voglia de t'allocà
tante smorfie non aje da fa;
fora le zeze e fora lo scuorno
anema e core e faccia de cuorno. -
Ciò sentenno la siè Sardella
s'affacciaje a la fenestrella,
fece 'nuocchio a zennariello
a lo speruto 'nnammoratiello.

Ma la Patella che steva de posta
la chiammaje faccia tosta,
tradetora, sbrevognata,
senza parola, male nata,
Ch'avea 'nchiantato l'Alletterato
primmo e antico 'nnammorato:
de carrera da chisto jette
e ogne cosa 'lle dicette.

Quanno lo 'ntise lo poveriello
se lo pigliaje Farfariello;
jette a la casa e s'armaje a rasulo
se carrecaje comm'a 'no mulo
de scoppette e de spingarde,
povere, palle stoppa e scarde;
quatto pistole e tre bajonette dint'a la sacca se mettette.

'Ncopp'a li spalle sittanta pistune
ottanta mbomme e novanta cannune;
e comm'a guappo Pallarino
jeva trovanno lo Guarracino:
la disgrazia a chisto portaje
che mmiezo a la chiazza te lo 'ncontraje
se l'afferra p''o crovattino
e po' lle dice: - Ah malandrino!

Tu me lieve la 'nnammorata
e pigliatella 'sta mazziata. -
Tuppete e tappete a meliune
le deva paccare e secuzzune,
schiaffe, ponie e perepesse
scoppolune, pecozze e conesse,
sceverechiune e sicutennosse
e ll'ammacca osse e pilosse.

Venimmoncenne ch'a lo rommore
periente e amice ascettere fore,
che co mazze, cortielle e cortelle,
chi co spate, spatune e spatelle,
chiste co barre e chille co spite,
chi co ammennole e chi co antrite,
chi co tenaglie e chi co martielle,
chi co terrone e sosamielle.

Patre, figlie marite e mogliere
s'azzuffajeno comm'a fere.
A meliune correvano a strisce,
de 'sto partito e de chillo li pisce,
che bediste de sarde e d'alose!
De palaje e rape petrose!
Sareche, dientece ed achiate,
scurme, tunne e alletterate!

Pisce palumme e pescatrice,
scuorfane, cernie ed alice,
mucchie, ricciole, musdee e mazzune,
stelle, aluzze e storiune,
merluzze ruongole e murene,
capodoglie, orche e vallene,
capitune, ariglie e arenghe,
ciefere, cuocce, traccene e tenghe.

Treglie, tremmole, trotte e tunne,
fiche, cepolle, lanne e retunne;
purpe, secce e calamare,
pisce spate e stelle de mare,
pisce palumme e pisce prattielle,
voccadoro e cecenielle,
capochiuove e guarracine,
cannolicchie, ostreche e ancine.

Vomgole, cocciole e patelle,
pisce cane e grancetielle,
marvizze, marmure e vavose,
vope prene, vedove e spose,
spinole, spuonole, sierpe e sarpe,
scauze, 'nzuoccole e colle scarpe,
sconciglie, gammere e ragoste,
vennero 'nfino colle poste,

capitune, saure e anguille,
pisce gruosse e piccerille,
d'ogni ceto e nazione,
tantille, tante, cchiù tante e tantone!
Quanta botte, mamma mia!
Che se devono arrassosia!
A centenara le barrate!
A meliune le petrate!

Muorze e pizzeche a beliune!
A delluvio li secozzune!
Non ve dico che bivo fuoco
se faceva per ogne luoco!
Ttè, ttè, ttè, ccà pistulate!
Ttà, ttà, ttà, llà scoppettate!
Ttù, ttù, ttù, ccà li pistune!
Bù, bù, bù, llà li cannune!

Ma de cantà so' già stracquato,
e me manca mo lo sciato;
sicché, dateme licienza,
graziosa e bella audienza,
'nfì che sorchio 'na meza de seje,
co salute de luje e de leje,
ca se secca lo cannarone
sbacantannose lo premmone.