Duos isposos a s'inscurigada
chilcan in Betlehem alloggiu invanu,
s'arreu in d'un istall'ilgarada
de su pianu.
Istraccos, accorados,
ogios a chel'alzados,
naran "Prommoredeu!"
e in Issa'han recreu.

Nascher deviat in domo reale
ca de sos mundos tottu è Soberanu;
subra sa paza invece ha su nadale
Deus umanu.
Sa paza est oro elettu
pro unu coru nettu;
naran "Prommoredeu!"
e in Iss'han recreu.

Ecco che nadu de viva lumera
che sole giaru allumat se pinnetta
e de Anghelos bolat un'ischera
in giru eletta.
E d'ogni parimentu
si mundat in cuntentu;
naran "O Deu, o Deu.
Ses se nostru recreu!".

Li attin donos dai sos cuiles
sos pastores, sos res li dan tesoros;
noi mancari indignos e umiles
demus sos coros.
Cun Zuseppe e Maria
cantende in allegria
nemus "O Deu, o Deu.
Ses su nostru recreu!".